Banku nasionál Comérsio Timor leste BNCTL sukursál Same segunda-feira hahú realiza pagamentu subsídiu ba benefisiáriu idoso nain rihun lima atus nén hat-nulu resin-hitu (5.647) iha Munisípiu Manufahi.
Diretór BNCTL sukursál Same Camilio Alves Soares tersa-feira (04/08) informa katak total orsamentu neebé governu aloka hodi halo pagamentu ba benefisiáriu idosu sira iha Manufahi hamutuk osan dollar Amérikanu juta ida resin, ba periodu fulan 6 nian husi fulan Janeiru too fulan Juñu tinan 2020, no total benefisiáriu iha munisípiu Manufahi hamutuk nain rihun lima atus nén hat-nulu resin-hitu (5.647), kompostu postu administrativu Same iha benefisiáriu nain rihun tolu atus rua nén-nulu resin-hat (3.264), postu Fatuberliu nain atus sía hat-nulu resin-tolu (943), postu Alas benefisiáriu nain atus úalu lima (805) no postu Turiscai benefisíaru nain atus nén tolu-nulu resin lima (635.
Tuir Camilio Alves Soares katak oráriu ba prosesu pagamentu nee distribui ona ba postu administrativu fatin hat no suku rua-nulu resin-sía, prosesu pagamentu hahú realiza iha postu administrativu Same hahú loron (03/08) kontinua ba postu administrativu sira seluk no sei remata iha loron (12/09) tinan 2020.
Diretór BNCTL sukursál Same nee hateten ba benefisiáriu sira neebé lao la diak familia benefisáriu sira informa direita ba xéfi suku no xéfi aldeia hodi aprezenta dadus iha tempu dadersan, molok funsionáriu banku sira halo pagamentu no obsaun seluk benefisiáriu neebé fó fiar ba familia tenki lori karta deklarasaun husi xéfi suku no hetan kuiñesementu husi administrdór postu hodi bele hetan pagamentu.
Entretantu tuir observasaun tersa-feira nee BNCTL kontinua halo pagamentu ba benefisiáriu sira iha postu administrativu Same nian neebé halo pagamentu iha BNCTL sukursál Same.
jornalista : Eva marques
