Komunidade Sub-Aldeia Kiran-Tetuk Suku Fatucahi Postu Faturberliu la dauk asesu ba estrada hodi defikulta komunidade sira.
Delegadu Sub-Aldeia Kiran-Tetuk Suku Fatucahi Postu Administrativu Fatuberliu Domingos de Jesus informa asuntu ne’e, ba ekipa integradu Administrasaun Munisípiu Manufahi ne’ebé xéfia husi Administrador Munisípiu Manufahi, bainhira halo asaun karidade fó apoiu fós ba familia vulnirável sira iha Kiran-Tetuk segunda-feira (10/08) hateten, komunidade uma ka’in 36 ho total populasaun 177 to’o agora la hetan asesu ba estrada hodi defikulta komunidade sira atu asesu ba saúde no merkadu.
Atu buka soluasaun ba situasaun ne’e Tuir Domingos de Jesus katak kuandu komunidade sira moras grave, komunidade sira tenki lori moras la’o ain ho distánsia kilómetru 20 resin ba postu Saúde iha Postu Administrativu Fatuberliu hodi hetan tratamentu, no atu asesu ba transporte komunidade sira organiza malu ke’e no hadia estrada maibe la konsege hadia hotu tanba komunidade ke’e ho liman.
Tanba ne’e komunidade sira husu ba Governu, atu tau matan ba estrada no harí postu saúde ida iha Sub-Aldeia Kiran-Tetuk hodi halo tratamentu ba komunidade sira.
Nune’e mós terseira idade Maria Alves hateten bainhira komunidade sira moras, konsumu de’it aimoruk tradisionál tanba komunidade sira la’o labele hodi hetan tratamentu iha postu Saúde, iha Postu Fatuberliu tanba ho distánisa kilometru 20 resin husi Kiran-Tetuk ba to’o iha Postu Administrativu Fatuberliu.
Responde ba asuntu ne’e Administradór Munisípiu Manufahi Arantes Isaac Sarmento hateten kona ba estrada sedu ka tarde sei tama iha Kiran-Tetuk, tanba iha Postu Fatuberliu antigu iha bee manas naturál ho Santuáriu ne’ebé poténsia ba turizmu, tanba ne’e oras ne’e dadaun liu husi programa R4D halo ona survei sei halo estrada hodi fasilita komunidade sira hodi asesu ba transporte públiku.
Nune’e mós Diretór Programa Nasional Dezenvolvimentu Suku (PNDS) Munisípiu Manufahi Luis Marçal da Costa Tavares informa katak kona ba postu saúde komunidade sira bele halo proposta hato’o ba Xéfi Suku, nune’e bele halo diskusaun no elisaun ba proposta iha nivél suku, hodi utiliza osan PNDS nian ne’ebé aloka ona ba suku hodi harí postu saúde, maibe depende ba diskusaun no elisaun iha Nivél suku kona ba prioritizasaun proposta.
Entretantu observasaun komunidade Kiran-tetuk dadaun ne’e asesu ona ba enerjía eletrisidade no bee mós maibe sei dauk asesu ba estrada.
Jornalista : Sandra Gloria
Editor : Eva Marques
