Manufahi———Ministeriu Administrasaun Estatal (MAE) ho ajénsia internasionál KOIKA tersa-feira (13/10), realiza sosializasaun programa Saemaul Undong ba autoridade sira iha salaun Novél da Paz Sentru Queshadip Ruak Same-munisípiu Manufahi.
Iha sosializasaun ne’e Embaixadór Korea Lee Chinbum hateten Saemaul undong hanesan movimentu ida ne’ebé implementa ona iha nasaun Korea hodi muda ema nia karakter hanesan muda mentalidade ema nian, hodi kumpri oras no realiza enkontru la gasta tempu ne’ebé naruk, iha nasaun Korea mós uluk realiza enkontru gasta tempu barak maibe la iha asaun, tanba ne’e liu husi programa Saemaul undong konsege muda ema nia mentalidade hodi kontribui ba dezenvolvimentu.
Embaixadór Korea ne’e isplika katak Primeiru minstru oitavu Governu intersante ho programa Saemaul undong hodi mistura ho programa nasionál dezenvolvimentu suku (PNDS) ne’ebé tuir planu sei implementa iha Timor leste.
Fatin hanesan Reprezentante ministru administrasaun Estatal aktuál espesialista programa dezenvolvimentu rural Rosito Guterres hateten, governu Timor Leste ho Governu Korea asina akordu ba programa Saemaul Undong iha tinan 2015-2016 no konsege implementa iha Munisípiu Lautem iha suku Foiluro konsege hetan suksesu, tanba ne’e liu husi sosializasaun ne’e hodi konsosializa autoridade lokal sira iha Manufahi tanba oitavu Governu prevé ona orsamentu atu implementa iha munisípiu hotu hahú tinan oin.
Fatin hanesan Administradór munisípiu Manufahi Arantes Isaac Sarmento agradese ba Governu Timor leste ho Governu Korea ne’ebé kría programa Saemaul Undong importante ba komunidade Manufahi hodi halo mudansa ba sidadaun Timor oan sira ninia pensamentu no sidadaun nia mentalidade hodi kontribui ba dezenvolvimentu rural iha suku no aldeia no dezenvolvimentu munisípiu nian.
Entretantu sosializasaun programa ‘’Saemaul undong’’ ne’e sei hala’o ona iha munisípiu balun no sei kontinua iha munisípiu hotu iha teritoriu tomak.(esm)
