by

‘’AUTORIDADE MUNISÍPIU MANUFAHI HO SARANI KATÓLIKA PAROKIA SAME, KONDENA AUTÓR ID FALSU INSULTA PADRE PAROKIA SAME’’

Autoridade munisípiu Manufahi ho Sarani Katólika parokia Nossa Senhora de Assunção Same, kondena autór ne’ebé insulta Padre Sabino sousa da Gama, iha média sosial Face-Book no husu ministériu kompetenti identifika autór hodi prosesa tuir Lei.

Liu husi konfrénsia imprénsa Domingu fin de semana (18/10), iha igreija parokia Nossa senhora de Assunção Same, visé presidenti konsellu parokiál Trinito Sarmento reprezenta Sarani sira kondena no lamenta ho atetude imorál husi individu ne’ebé uza média sosial iha Pájina face book ho naran ID Munisípiu Manufahi, públika informasaun falsa hodi ataka no insulta privasidade Padre parokia Nossa Senhora de Assunção Same iha públiku, sábadu kalan (17/10/2020).

Presidenti konsellu parokiál Same ne’ebé hodi sarani katólika Sam Parokia Same nia naran, rezeita totalmente informasaun falsa ne’ebé públika iha FB hodi dún matak Amo Parku Same maka impede no responbiliza ba rehabilitasaun Igreija Same, ne’e la lós, tanba rehabilitasaun Igreija Same kabe ba responsabilidade Governu ho kompaña implementadór, la’os responsabilidade parte Igreija nian.

Fatin hanesan visé presidenti eskola katólika São Miguel Arcanjo Same (COSAMAR) Luis Bauk-Taek, hodi estudante, inan-aman no profesór sira iha eskola COSAMAR deklara, rezeita informasaun falsa ne’ebé públika iha Média sosial ne’e la lós, tanba orsamentu eskola nian jere husi strutura eskola hamutuk ho padre parokia hanesan diretór eskola maka foti dezisaun hamutuk uza ba nesesidade eskola nian, hodi halo kontruksaun ba uma eskola tolu ne’ebé dadaun ne’e kontruksaun la’o hela inklui fasilidade iskola nian sira seluk.

Segunda-feira ohin (19/10), wainhira Jornalista sira ba konfirma ho administradór munisípiu Manufahi Arantes Isaac Sarmento deklara katak hanesan servidór povo iha Manufahi lamenta no rezeita ho informasaun falsu ne’ebé individu balun Públika iha medsos, hodi insulta no desfama lideransa Igreija katólia nian iha Manufahi, tanba rehabilitasaun igreija Same ne’ebé gasta orsamentu jeral do estadu ho montante dollar Amérikanu besik rihun atus lima ($ 500,000.00) ne’e responsabiliza husi governu ho kompaña, tanba orsamentu mai husi programa dezenvolvimentu integradu Munisípiu (PDIM) nian no sistema kontrolu husi administrasaun munisípiu Manufahi rasik maka halo kontrolu, tanba ne’e projetu rehabilitasaun ba igreija ne’e remata sedu ka tarde ne’e responsabilidade governu nian, la’os husi parte Igreija, maske nune’e rehabilitasaun ba igreija rasik remata ona no hela de’it rehabilitasaun ba kapela inklui jardin ho torre igreija nian iha tempu badak sei finaliza.

Lider Maximu munisípiu Manufahi ne’e lamenta ho atetude ema individu balun ne’ebé desfama lideransa igreija nian, no husu ba ministériu Justisa no telekomunikasaun atu identifika no prosesa tuir lei ne’ebé vigór iha Timor leste.

Loron hanesan jornalista sira konfirma ho komandante Polisia Manufahi superintendenti Polisia Joni Viana das Regras informa katak parte Polisia simu ona keiza husi konsellu parokia Same hodi submete ba prosesu investigasaun ba autór insulta no desfama lideransa igreija katólika nian iha Same-Manufahi.

Entretantu hafoin remata konfrénsia imprénsa iha domingu lorokraik (18/10), konsellu parikiál lori kedas kazu públikasaun ne’e ba hato’o kedas keixa iha komandu polisia Manufahi hodi prosesu tuir lei iha nasaun ne’e.(Senya)

Comment