Manufahi__RKM News : Sidadaun nain lima (5) kompostu husi feto 3 mane 2 oras ne’e kuarentena hela iha Sentru saúde Munisípiu Manufahi tanba viajen husi Munisípiu Bobonaro mai Munisípiu Manufahi..Segunda (08/03)
Tuir Komandante Komando Polísia Manufahi Superintendente Joni Viana Das Regras ba Jornalista sira informa Sidadaun nain lima ne’ebé kuarentena ne’e, nain hat (4) hanesan familia uma kain ida kompostu husi inan, aman, no oan nain rua halo viajen husi Munisípiu Bobonaro mai iha aldeia Selihasan Suku Betano Postu Administrativu Same Munisípiu Manufahi no Parte Polísia ba foti kedas iha Domingu kalan lori mai entrega iha Sentru Saúde Manufahi, no mane ida seluk viajen mós husi Munisípiu Bobonaro mai iha Kamilaran Suku Letefoho postu Administrativu Same Munisípiu Manufahi no parte polísia ba foti iha Segunda dader 08/03.
Komandante Komando Polísia husu ba autoridade Suku atu halo mós kontrolu ba sidadaun sira karik deskonfia oin foun mosu iha suku laran tenke hato ba parte polísia no servisu saúde hodi bele foti ba tau iha kuarentena nune’e bele prevene transmisaun lokal ba iha Covid 19.
Nune’e mós Xefe Saúde Internamentu Manufahi Manuel Da Costa Ferreira hateten sidadaun nain lima ne’e oras ne’e kuarentena ona iha Polo Sentru saúde Manufahi.
Xefe saúde Internamentu hatutan hare ba situasaun apertadu dadaun parte saúde mós sei fo avizu ba komunidade sira liu husi toa kona ba oinsá atu bele prevene an husi Kutun Covid 19.
Entertantu sidadaun nain lima (5) ne’ebé kuarentena ohin halo teste SWAB hodi haruka ba Sentru saúde Dili no sei anunsia rezultadu hafoin oras rua nulu resin hat (24).
Leky Mauk
