Responsável imunizasaun Munisipiu Manufahi, Domingos Tavares informa ba jornalista sira, iha enkontru avaliasaun programa vasínasaun AstraZeneca iha salaun servisu Agrikultura Manufahi Sesta-feira (30/04) ohin hateten, dadus ne’ebé parte saúde halo enumerasaun ba liña frenti sira, kada instítuisaun estadu no sosiedade sivíl sira iha Manufahi, total ema na’in atus nén sía-nulu resin-haat (694), maibé dadus aumenta tan, sa’e ba ema na’in atus sía, sía-nulu resin-nén (996), tanba aumenta tan liña frenti sira ne’ebé la’os iha Primeira fasé nian inklui komunidade balun.
Husi ema na’in 996 ne’e iha lansamentu vasinasaun AstraZeneca nebe halo iha kinta-feira (15/04), konsege halo ona vasínasaun AstraZeneca ba ema na’in 751, no ema na’in atus rua sanúlu resin-lima (215) maka la vasína tanba lakohi vasína.
iha enkontru avaliasaun ne’e, xéfi programa planeamentu famíliar no pontu vokál monitorizasaun vasinasaun astrazeneca Munisípiu Manufahi, Aúrea Celina Martins da Crúz neebé reprezenta Ministra Saúde, agradese ba Komisaun Covid-19 lidera husi Administradór Munisípiu Manufahi, apoiu másimu ba programa prevensaun Covid-19 iha Manufahi la’o suksesu, Ministériu Saúde rasik rekoñese frakeza balun tanba la halo sosializasaun uluk ba vasinasaun AstraZeneca ba komunidade sira molok halo vasinasaun iha Manufahi, atu kompriende didiak vantajén husi vasinasaun AstraZeneca ne’e, maibé Ministériu Saúde halo sosializasaun uluk ba Munisípiu ne’ebé afetadu ba Covid-19.
Aúrea Celina Martins da Crúz isplika katak Ministériu Saúde sei esforsu atu halo sosializasaun ba komunidade sira molok implementa vasínasaun segundu fáse oin mai.
Fatin hanesan, Administradór Munisípiu Manufahi Arantes Isaac Sarmento hateten vasinasaun AstraZeneca konsidera la’o ho suksesu maibe hasoru dezafiu lubuk ida, li-liu kona ba sidadaun sira konsumu informasaun falsu (HOAX) iha média sosial, kona ba dezvantajén vasinasaun AstraZeneca, maske nune’e la hamate espíritu komisaun nian hodi halo prevensaun ba Covid-19 iha Manufahi.
Administradór Manufahi ne’e husu ba komponenti hotu, atu sai mata-dalan fahe informasaun ne’ebé lós ba komunidade sira kona ba vasinasaun AstraZeneca iha fáse tuir mai.(Vas).
