by

Manufahi Implenta ona Serka Sanitaria

Autoridade  Munisípiu Manufahi, Husu ba sidadaun sira kumpri sérka sanitáriu hodi salva povo Manufahi, husi transmisaun komunitária Covid-19.

 

Arantes Isaac Sarmento, núdar Presidenti Komisaun Task-Force Covid-19 Munisípiu Manufahi, hato’o asuntu ne’e ba jornalista sira Sesta-feira (30/04) ohin informa katak, baseia rezolusaun Governu númeru 53/2021 loron 29 fulan-Abríl 2021, Munisípiu Manufahi mós aplika ona sérka sanitáriu, durante loron 14 hahú óras 00:00 loron 30 fulan-Abríl 2021 to’o loron 16 fulan-Maio 2021.

 

Resolusaun ne’e, sei limite movimentasaun sidadaun sira, husi Munisípiu Manufahi ba Munisípiu seluk, ba sidadaun ne’ebé atu sirkúla ba Munisípiu seluk no sidadaun ne’ebé atu tama mai Munisípiu Manufahi tenki hetan karta autorízasaun husi Sentru Integradu Jestaun Kríse (SIJK),tanba SIJK maka iha kompeténsia no autoríza sidadaun sira tama no sai husi Munisípiu ida ba Munisípiu seluk.

 

Administradór Manufahi ne’e informa ba sidadaun sira katak, postu entrada Leusate, Simpantiga-Daisua, no Postu Fatuberliu, sei halo atendementu sirkulasaun sidadaun sira husi Munisípiu ida ba Munisípiu seluk, maibé tenki hetan karta autorízasaun husi SIJK no atendementu ne’e sei atende de’it iha loron Segunda-feira, kuarta-feira no Sesta-feira, no postu entrada sira sei la atende sirkulasaun sidade sira  iha loron Tersa-feira, kinta-feira, sábadu no Domingu, sei la autoríza komunidade sira atu sirkula ba-mai husi Munisípiu ida ba Munisípiu seluk.

 

Resolusaun Governu ne’e, suspende mós atividade serimónia kulturál, divertimentu, aktividade relíjioza sira, no atividade sira seluk ne’ebé halibur ema barak.

 

Administradór Manufahi ne’e, apela ba sidadaun sira iha Manufahi, labele pániku maibe kopera ho estadu  kumprí sérka sanitáriu iha Manufahi, hodi prevene transmisaun komunitária Covid-19, nune’e bele hakotu sérka sanitáriu iha Munisípiu Manufahi.

 

Komandante Komandu Polísia Munisípiu Manufahi, Superintendenti Polísia Joni Viana das Regras hanesan Visé Presidenti Komisaun Covid-19 asuntu siguransa, iha enkontru avaliasaun vasínasaun AstraZeneca iha salaun Servisu Agrikultura Manufahi Sesta-feira (30/04) ohin informa katak, hafoin estadu deside Manufahi implementa sérka sanitáriu hahú ohin Sesta-feira (30/04), Polísia halo kedas operasaun hodi fó atensaun ba sidadaun sira ne’ebé halo movímentu ho transporte públiku iha sidade Same, inklui komunidade sira ne’eb’e la’o ain, tenki kumprí sérka Sanitáriu uza máskra, distánsia sosial no fasé liman bebeik.

 

Komandu Polísia mós orienta ona postu entrada sira iha Postu Fatuberliu, postu entrada simpantiga-Daisua no Leusate, atu nafatin kontrólu ho regurózu ba sidadaun ne’ebé sirkula tama-sai iha área Munisípiu Manufahi ne’ebé la kumprí sérka sanitáriu.

 

iha parte seluk, Komandante Polísia hanesan mós Visé Presidenti Komisaun Task-Force Covid-19 asuntu siguransa, apela ba Komisaun Covid-19 husi pilár 1 to’o pilár 9 servisu ho sériadade hodi relata relatóriu ne’ebé adekuadu no lós, li-liu kona ba dadus sidadaun ne’ebé tama-sai iha área Manufahi, inklui mós dadus kona ba sidadaun ne’ebé iha izólamentu inklui kuarentena. (Vas).

Comment