by

Ekipa Lina Frenti Nivel Suku Ejiji Direitu Ba Governu

 

Manufahi RKM News=====Sefí suku 29 iha munisípiu Manufahi ne’ebé involve  iha ekipa téknika liña-frenti ba prevensaun covid-19 ejíji sira nia direitu ba Governu.

 

Séfi Suku Dotik Sebatião da Costa Amaral,Sefí suku Taitudak Alcino da Costa no séfi suku Taitudak postu administrativu Alas, hato’o ejijénsia ne’e ba visé ministru administrasaun estatal (MAE) iha sorumutu ho autóridade no lideransa komunitária sira iha postu administrativu Alas kinta-feira (27/05) horsehik.

 

Séfi suku sira informa, durante ne’e kumpri ona sira nia dever servisu hamutuk ho pesóal saúde halo esforsu hodi kombate covid-19 iha nivél suku no aldeia, maibé governu  fó subsídiu de’it ba pesóal saúde no membru polísia sira, maibé lideransa komunitária inklui ekipa liña-frenti sira seluk la hetan atensaun husi  governu.

 

Iha parte seluk, Sefí suku sira mós aprezenta  defikuldade kona ba populasaun sira iha suku Dotik aldeiaWeberek no Sarin, suku Aituha no suku sira seluk to’o oras ne’e seidauk asesu ba estarda,bee mos no eletrisidade.

 

Responde ba asuntu ne’e visé ministru MAE Lino de Jesus Torezão hateten, kompeténsia MAE nian sei luta makas iha konsellu ministru atu deside ba asuntu ne’e, tanba ne’e estrutura task-force ne’ebé estabele ona sei kría mós dekretu lei hodi haré ba asuntu ne’e, no bainhira públika ona iha jornál da repúblika governu sei responde direitu ekipa task-force ne’ebé hala’o knár ba prevensaun covid-19, bele hetan mós sira nia direitu.

 

Hatan kona ba problema estrada, eletrisidade no bee mos, administradór munisípiu Manufahi Arantes Isaac Sarmento hateten, kona ba eletrisidade iha aldeia weberek suku Dotik loke ona kunkursu tenderizasaun ba instalasaun liña eletrisidade husi Tatekar to’o aldeia weberek, no husi suku Letefoho ba to’o suku Rotuto postu administrativu Same edtl,ep maka sei implementa, kona problema bee mos iha aldeia Sarin, iha tinan hirak liu ba implementa ona maibé to’o ikus komunidade la hetan bee mos, tanba ne’e liu husi programa nasional dezenvolvimentu suku (PNDS) kona ba sira asuntu bee mos inklui estarda atu implementa iha tinan oin.

 

Administradór Manufahi saliénta, kona ba suku sira seluk iha munisípiu Manufahi ne’ebé infrenta problema hanesan, governu sei la taka matan maibé resolve tuir fáze.

 

Entretantu visé ministru MAE kuarta-feira (26/05) ne’e, halo mós sorumutu ho lideransa komunitária no autóridade sira iha salaun administrasaun munisípiu, lideransa komunitária sira aprezenta mós problema komunidade balun seidauk simu subsídiu kada uma-ka’in, inklui suku balun komunidade sira seidauk hetan Sesta-básika, no visé ministru MAE responde katak sei aprezenta kestaun ne’e iha konsellu ministru hodi buka solusaun.(EK).

Comment