Manufahi RKM News====Rede Monitorizasaun Dezenvolvimentu (RMD), lamenta kontruksaun fatin izólamentu iha bubur laran Munisípiu Manufahi ne’ebé gasta orsamentu dollar Amérikanu rihun atus tolu, tolu-núlu resin sía atus úalu rua-nulu resin-úalu pontu úalu-nulu resin-úalu ($ 339,828.88) finaliza tarde hodi salva sidadaun sira husi Covid-19.
Visé Kordenadór RMD Munisípiu Manufahi Isaac da Costa Sarmento Sesta-feira (21/05) foin lalais, ba halo inspeksaun ba kontruksaun fatin izólamentu iha bubur laran ba jornalista sira informa, governu la sériu atu kombate Covid-19 iha Munisípiu Manufahi, tanba kontruksaun fatin izólamentu ne’e tuir kontratu prosesu konstruksaun durante fulan 3 nia laran tenki finaliza ona, maibé realiza kontruksaun kontratu hahú iha fulan-Dezémbru tinan 2020 maibé to’o ohin loron kontruksaun foin atínji pursentu 30, loloos projetu ne’e emerjénsia tenki finaliza tuir kontratu no labele konsidera hanesan projetu normál.
Rede Monitorizasaun Dezenvolvimentu (RMD) mós lamenta iha prosesu kontruksaun ne’e, la iha kontrólu másimu husi ajénti projetu munisípiu nian, hodi fó impaktu ba prosesu kontruksaun finaliza tarde, tanba ne’e sujere ba governu atu aselera lalais kontruksaun fatin izólamentu ne’e, hodi kombate covid-19 ne’ebé ameasa sidadaun sira nia vida iha munisípiu ne’e.
Fatin hanesan Menejer Projetu kompaña Daloveya Unipesoál Lda. Majorico Ceke Tali rekueñese katak, tuir kontratu projetu ne’e implementa durante fulan 3 nia laran tenki finaliza, maibé finaliza tarde tanba hafoin asina kontratu durante fulan ida nia laran la implementa projetu ne’e, tanba governu seidauk defíni loloos kona ba rai ne’ebé atu halo kontruksaun, entaun fó tempu ba governu atu halo diskusaun kona ba rai, depois iha prosesu kontruksaun mosu tan mudansa husi governu tanba hamosu tan item balun kona ba kontruksaun nian, entau kompaña husu tempu adisionál iha mudansa ba dezeñu kontruksaun nian, iha prosesu kontruksaun la’o mosu tan serka sanitáriu inklui mosu inundasaun boot iha Dili hodi prejudika ba distribuisaun material kontruksaun husi Dili mai Same.
Menejer projetu ne’e informa katak, kontruksaun projetu ne’e atinji ona porsentu 30 no kompaña promete fulan rua nia laran sei finaliza projetu ne’e. kontruksaun fatin izólamentu ne’e ho medida luan metru 14,4, naruk metro 23,4, sala baixa iha 6 sei akumula kama 25 inklui sala ba médiku sira.
Entretantu jornalista sira konfirma asuntu ne’e, ho Diretora Serbisu Saúde Munisípiu Manufahi Florencia Corte-Reál Tilman segunda-feira (24/05) ohin, klarifika katak projetu ne’e halo tenderizasaun entre Ministériu Saúde ho kompaña iha Dili, no implementa hahú iha fulan-Fevereiru tinan 2020.
Diretóra Florencia Corte-Reál Tilman konsidera konstrusaun ba fatin izólamentune’e atraza duni, tanba relasiona ho pandémia covid-19, no parte servisu saúde nafatin halo kontrolu ba projetu ne’e, no parte kompaña rasik sei esforsu atu finaliza iha tempu badake(Ekipa Kobertura)
