Manufahi RKM News====Administradór Munisípiu Manufahi, husu urjéntemente Ministériu Transporte Telekomunikasaun hadia sistema servisu Diresaun Nasional Transporte Treste (DNTT), tanba sidadaun sira iha Manufahi tinan 7 ona balun seidauk hetan dokumentu urjínal kareta ho Motór nian (STNK).
Administrador Munísipiu Arantes Isaac Sarmento hato’o asuntu ne’e ba jornalista sira, wainhira hamutuk ho Komandante Komandu Polísia Manufahi, halo inspeksaun urjénti ba servisu Dirasaun Transporter Treste rejiaun Same kuarta-feira (02/06) horsehik.
Administradór Arantes Isaac Sarmento hateten, inspeksaun ne’e baseia ba pasarevista ne’ebé Polisia sira hala’o iha Manufahi, maiória komunidade sira hato’o lamentasaun, bainhira ba trata dokumentu kareta ho motór (STNK) inklui kartaun kondusaun (SIM) iha Dirasaun Transporter Treste rejiaun Same, maibé labele halo atendementu, tanba sei hein sistema servisu Diresaun nasional Transporte Treste (DNTT) iha Akanunu-Dili, ida ne’e la justu, tanba sistema labele defikulta fali komunidade sira atu hadia sira nia moris.
Arantes informa, Iha inspeksaun ba edifísiu dirasaun Transporter Treste rejiaun Same, detekta hetan blanku inklui makina 2 hodi prodúz kartaun kondusaun no dokumentu kareta ho motór nian iha hela ho kondisaun di’ak, maibé dirasaun ne’e labele utiliza hodi halo atendementu ba komunidade sira, tanba tenki hein sistema husi nasional inklui kompaña ne’ebé governu fó fiar husi Dili maka prodúz dokumentu kareta ho motór nian.
Administradór Munisípiu Manufahi ne’e husu urjénti, ba Ministériu Transporte Telekomunikasaun atu hadía sistema servisu, atu nune’e labele defikulta komudade sira iha Manufahi, tanba komunidade sira sempre hetan pasarevista husi polísia tranzítu no kontinua selu koéma iha banku, maibé dirasaun ne’e labele prodúz STNK orijinál inklui SIM, tanba sei hein sistema ne’ebé konsentradu iha Dili, inklui komunidade balun maske trata ona dokumentu durante tinan 7 ona to’o agora la hetan STNK urijínal.
Fatin hanesan, Komandante Komandu Polisia Munisipiu Manufahi, Joni Viana Das Regras Subliña, pasarevista ne’ebé polísia halo dalaruma ema ida bele komete to’o dalarua ka dala tolu, no kontinua ba selu koéma iha Banku, ida ne’e la duun di’ak, tanba polísia sira haruka ba trata dokumentu maibé Dirasaun Transporter Treste rejiaun Same, labele atende komunidade sira tanba hein sistema husi nasionál, ida ne’e defikulta komunidade sira, ho inspeksaun ne’e oinsa ministériu relevante bele hadia sistema servisu iha dirasaun ne’e.
Wainhira jornalista sira konfirma problema ne’e ho Diretór Interinu Dirasaun Transporter Treste rejiaun Same, Lubito de Andrade da Costa Isaac la halo komentáriu ba asuntu ne’e, maibé nia informa katak sei hato’o ba ninia diretór, ne’ebé dadaun ne’e sei halo hela servisu importante balun iha Dili.
Entretantu tuir obsevasaun, edifísiu dirasaun transporter Terres trés rejiaun Same, durante ne’e halo atendementu ba komunidade sira husi Munisípiu Ainaro, Covalima, Natarbora-Manatuto inklui Manufahi,maibé kondisaun edifísiu ne’e udan tama iha sala laran, inklui dokumentu balu tau de’it iha rai tanba armáriu limitadu.(ekb)
