Manufahi RKM News====Komunidade Suku Mahaquidan Postu Adminstrativu Alas tersa-feira (15/06) semana Kotuk, maioria simu ona vasinasaun AstraZeneca hodi hasa’e imunidade hasoru Covid-19.
Komunidade Paulina Miranda ho idade Tinan 60 resin, bainhira hetan vasinasaun iha lansamentu vasinasaun dozi daruak ba liña-frenti sira no dozi dahuluk ba komunidade sira ne’ebé lansa iha sentru Saúde Wedauberek Postu Administrativu Alas, informa katak hau mai ho voluntáriamente mai simu vasinasaun AstraZeneca ne’e atu salva nia vida husi Covid-19.
Nune’e mos Manorin Na’in eskóla EBC Mahaquidan Bernardino Tavares hanesan mós komunidade hateten, ha’u mai simu vasinasaun AstraZeneca ne’e ho voluntáriamente tanba hakarak prevene-an husi Covid-19, ho nune’e ha’u bele sirkula ba mai, tanba ne’e husu ba komunidade hot-hotu no foinsa’e sira iha Postu Administrativu Alas, atu hakbesik-an ba iha Postu vasinasaun ne’ebé estabeleze ona iha Postu Administrasaun Alas nune’e hodi prevene ita nia an husi covid-19.
Fatin hanesan Sefi Sentru Saúde Postu Administrativu Alas José Martins da Costa relata katak, total postu vasinasaun ne’ebé estabele ona iha Postu Administrativu Alas hamutuk 26 iha Aldeia 19, hodi vasina komunidade sira ne’ebé rejista ona inklui liña-Frenti sira ho total ema na’in 2.337, ne’ebé atu simu vasinasaun dozi daruak ba liña-Frenti sira no dozi da-huluk ba komunidade sira.
Administradór Munisípiu Manufahi Arantes Isaac Sarmento, halo lansamentu ba vasinasaun ne’e agradese ba struktura ekipa Task Force Covid-19 Postu Administrativu Alas, ne’ebé kompostu husi autoridade postu, suku to’o aldeia, parte siguransa, lider partidu politiku no veteranu sira, iha postu Alas ne’ebé halo esforsu hodi halo sosializasaun vasinasaun AstraZeneca ba komunidade sira, nune’e komunidade sira bele hatene kona ba oinsa atu hasa’e imunidade komunidade nian hasoru Covid-19, tanba ne’e Administrdór Munisípiu ne’e, apela ba komunidade sira labele tauk no labele fiar informasaun falsa sira maibé hakbesik-an ba postu vasinasaun hodi prevene-an husi Covid-19.
Entretantu tuir observasaun iha lansamentu vasinasaun iha postu Administrativu Alas, hetan partisipasaun masimu husi lideransa komunitária sira, komunidade terseira idade, Veteranu, joven inklui Manorin Na’in sira.(ek)
