by

Administrador Munispiu Hahu Hala’o Vizita Komunitario Ba Aldeia 137 Iha Munispiu Manufahi

Manufahi RKM News===Administradór munisípiu Manufahe hahú sesta-feira horsehik (02/07), hahú hala’o Vizíta komunitária tama-sai aldeia, hodi rona direitamente defikuldade ne’ebé komunidade sira hasoru, nune’e hodi prepara ba planu dezenvolvimentu Munisípal nian ba tinan 2022.

Iha vizita dahuluk iha aldeia Hatuhei suku Rotuto Postu Administrativu Same, komunidade António da Costa Silva, Joventude Mirto Moníz do Carmo, no komunidade Adriano da Costa, hato’o defikuldade kona ba esténsionísta la hala’o nia knár, hodi motíva agrikultór sira kona ba téknika agríkultura nia ba komunidade sira iha suku Rotuto ne’ebé poténsia liu ba setór agrikultura.

‘’ no komunidade sira husu atu rekruta guarda florestal destaka iha suku ne’e, hodi kontróla área protejídu tanba suku Rotuto poténsia mós ba setór turismu.Afirma Komunidade Rotutu

Alende Ne’e Komunidade sira mós husu, atu halo uma ba Ofisiál Polísia Suku (OPS) no Dotór, nune’e sira bele hela metin hodi fó atendementu ba komunidade sira.

‘’iha Parte Seluk joven sira husu atu kría Mos kampu de servisu iha suku laran, inklui bolsa estudu ba veteranu nia oan sira.hatutan Husi Joven Rotutu

Hatán ba preukupasaun hirak ne’e, Administradór Munisípiu Manufahe Arantes Isaac Sarmento hateten, kona ba esténsionísta Administradór rasik toma nota hodi resolve, tanba Administradór rasik hasai ona karta sirkulár ba Administradór Postu sira atu orenta sefí suku sira, kontróla esténsionista sira.

Administrador Ne’e hateten estensionista sira nia lista presensa tenki hetan vístu husi sefí suku sira, tanba governu aloka ona osan operasional (DEMPLOT) ho montante dolllar Amérika $ 250.00 kada trímestral, ba esténsionista sira iha suku 29 iha Munisípiu Manufahe, hodi halo to’os ezemplár (Kebun percontohan).
Arantes Isaac Sarmento hatán kona ba kampu de servísu iha suku, governu alóka ona orsamentu mão de obra kada postu administrativu, ho montante osan dollar Amérikanu $ 50,000.00, kría kampu de servisu ba foinsa’e no komunidade sira.

‘’orsamento Ne’ebe Aloka Atu hodi hamos fatin publiku sira iha suku laran, kona ba guarda floresta administradór mos orenta ona Diretór Agríkultura tau iha planu orsamentu hodi rekruta guarda floresta sira fasé por fasé hodi destaka ba suku sira, tanba dadaun ne’e guarda florestal iha munisípiu limitadu.

Uma ba dotór iha suku, liu husi inkontru ho diretór servisu munispais sira, administradór orenta ona diretóra saúde tau planu orsamentu ba tinan 2022 halo uma ba dotór sira kada suku, kona ba bolsa de estudu ba veteranu nia oan sira, governu mós tau ona orsamentu bolsa de estudu ka rejíme spesiál ba veteranu nia oan sira, tinan ne’e hahú implementa iha Universidade Timor Lorosa’e UNTL.

Hatan kona ba halo uma ba ofisiál polisia suku OPS, Komandante Komandu Polísia Munisípiu Manufahe Superintendenti Polísia Joni Viana das Regras hateten, liu husi programa PNDS, tau ona planu atu halo uma ba OPS sira iha Suku, maibé problema maka rai, tanba ne’e husu lideransa komunitária sira atu oferese rai iha suku ida-idak hodi halo kontruksaun uma ba OPS sira.

Entretantu tuir planu segunda-feira (05/07) semana oin, Administradór Munisípiu ho ninia ekipa sei kontinua halo vizita iha aldeia balun iha suku Rotuto, no kontínua ba aldeia sira seluk iha suku 29 iha Munisípiu Manufahe laran tomak.

‘’ho intensaun atu halo diálogu ho komunidade sira, hodi hatene kona defikuldade ne’ebé komunidade sira hasoru, inklui kona ba rezultadu dezenvolvimentu ne’ebé hala’o ona iha suku benefísia duni ba komunidade sira ka lae.

Iha vizíta komunitária ne’e, la involve Administradór Postu sira, no Diretór Servisu Munisípais sira, tanba Administradór hakarak rona direita husi komunidade sira, kona ba atendementu servidór estadu nian ba komunidade sira iha suku no aldeias.

Objestivu seluk husi vizíta komunitária ne’e, atu hametin koperasaun entre katuas lisan sira, igreija no estadu, (FATUK LALE’AN TOLU), atu garantía prosesu dezenvolvimentu iha Munisípiu Manufahe.(esm)

Comment