Manufahi RKM news – Durante okupasaun Indonesia to’o ukun an Suku Bubususu Postu Administrativu Fatuberlihu Munisípiu Manufahi, kontinua leba motor hodi hakat mota Suhin tanba ponte hodi fasilita komunidade sira iha tempu udan hodi lori sira nia produtu lokál ba iha merkadu.
Xefe Suku Bubususu Estanislau Borges husi Postu Administrativu Fatuberlihu Munisípiu Manufahi, husu ba Governu atu harii ponte ida iha mota Suhin tanba tempu udan komunidade leba motor mak hakat liu mota refere.
“ami durante ukun aan até ohin loron, ami enfrenta hela, problema mak estrada liga husi suku ba posrtu munispiu até a data la iha ponte, agora ha’u mai iha ne’e motor leba de’it” dehan Estanislau Borges iha Salaun Parokiál Nossa Señora de Assunsaun Same iha ambitu dialogu Ho Prezidente Repúblika Francisco Guterres Lú-Olo, Kuarta-Feira (17/11)
Nia afirma, kondisaun estrada iha Suku refere mós aat tanba seidauk rehabilitasaun iha suku Bubususu ne’e rasik.
Alende ne’e Xefe Suku mos rekomenda atu oferese Solar Pannel tanba tinan barak Komunidade iha suku refere seidauk asesu ba eletrisidade.
“kona ba eletridade ami hakarak governu fasilita ami ho Solar Painel tanba ami nia problema ida mak eletrisidade” nia rekomenda.
Iha Postu Fatuberlihu iha suku lima (5) maibé iha suku tolu (3) iha sidade ne’e asesu ona ba estrada no eletridade mak hanesan, Caicasa, Fatukahi, no Klaku, no suku rua (2) hanesan, Bubususu no Fahinehan mak seidauk asesu eletrisidade no estrada no iha tempu udan komunidade sira leba motor hakat mota Suhin no iha mota Karaulun iha ponte tabele gantung ida ne’ebe dadaun kondisaun grave hela.
Dadaun ne’e Ministeriu Obras Públikas (MOP) liuhusi Instituto Gestaun no Ekipamentu (IGE) loke estrada ba komunidade sira iha lokal sira, iha postu no suku sira.
IGE mós kontribui fasilita loke estrada foun ba komunidade sira bainhira komunidade sira halo pedidu atu loke estrada foun iha suku remotas sira. (Ina Araújo)
